طبعا كله دلوقتى مستنى بكره و الناس متوتره سواء القائمين بالأضراب أو المعترضين على فكرته العشوائيه علشان شايفيين أن الأضراب ملوش هدف محدد المهم أنا كتبت فى النقطه ديه و متخوفين أيضا من مواجهه المظاهرات بعنف من الأمن الذى يقمع أى محاوله للتظاهر .
و بشكر الناس ألى أتكلمت معايا بحوار متحضر و برده بشكر الناس ألى شتمونى و عادى حصل خير بس كويس أن الواحد عرف يصنف الناس و عرف مين بيؤيد حريه الرأى و التعبير و بيحترم الأراء المعارضه ليه و مين بيمثل أنه مع حريه الرأى و التعبير و مين ميفهمش أصلا يعنى ايه حريه رأى و تعبير و بيشتغل نفسه .
كله بيتخيل أيه ألى هايحصل أنا منكرش أن موضوع الأضراب ده مسمع جامد لدرجه ان البواب بتعنا عارف و بيقولى أنه نازل فأهنىء دعاه الأضراب على الشو الأعلامى الجميل ده .
أنا لاحظت أن فيه فئات كتير أول مره تشترك فى عمل جماهيرى فى الشارع فى حاجه غير الكوره فعايز أقول شويه حجات نفسى الناس تركز فيها بكره قبل ما أقول السيناريو ألى أنا متوقعه نتيجه قرائاتى للدعايا ألى أتعملت للأضراب :
أنا نزلت صورت عشرات المظاهرات و الأضرابات و أفهم لحد ما خطط الأمن المركزى فأسمع منى الكام نصيحه مش بقولكو أمشو عليهم بس على الأقل لو أحتجتلهم أستخدم النصيحه :
فيه أحتمال كبير أن الأمن يسيب مظاهره ميدان التحرير و هايتم جمع المظاهرات الصغيره ألى هاتحصل فى طلعت حرب ( أحذر هايبقى فيه عكش للتجمعات فى طلعت حرب علشان هايمنع أى مظاهره لصعوبه عمل كردون ضخم فى الميدان ) يعنى التحرير المكان المناسب لكردون ضخم ممكن يشيل لأمتر من 20 ألف متظاهر و الأخوان هايتمركزو عند نقابه المحامين و سلم نقابه الصحفين زى ما ورد فى البيانات بتاعتهم و عند تقاطع الأسعاف شويه إخوان هايقفو عند السور ألى قدام فلفله و هايتعكشو تمام زى ما حصل فى مظاهرات القضاه و شويه منهم هايروح عند المحامين و ألى هايلف عند نادى القضاه علشان يوصل للصحفيين هايتشد من عند الشارع ألى بيطلعه على عبد الخالق ثروت ألى على ناصيته نادى القضاه . ( الحوار ده حصل زيه بالظبط فى مظاهره التضامن من لبنان – ال 3 خمسان السود بتوع أنتفاضه القضاه ) .
و ديه صوره أفتراضيه لحصار التحرير ألى هايحصل بكره :
صوره من مظاهره فى ميدان التحرير سمك الكوردون 12 صف عساكر يوم 26 / 7 / 2006 مظاهره للتضامن مع الشعب اللبنانى .
صوره لكوردون حقيقى عساكر يوم 26 / 7 / 2006 مظاهره للتضامن مع الشعب اللبنانى .
لو انت نازل التحرير خلى بالك من الحوارات ديه :
البنات يكونو فى النص و ميقربوش من حدود الكوردون علشان العساكر دول محبوسين و مش بيشوفو بنات
موبايلك أو أى حاجه غاليه سيبها فى البيت
أى محاولات دفع بشريه تجنبها علشان متتعرضش للهرس
أبتعد عن الشعارات السياسيه و الدينيه ألى هايقولها منظمين الأضراب وركز على هتافات الخاصه بموضوع الأضراب زى الأسعار و الغلاء و كده و ملكش دعوه بأى حد بيحاول أنه يشتبك مع الأمن علشان ألأمن عندنا غبى .
مش أى حد يديك صوره أو لافته تمسكها شوف الأول مضمون الافته أيه و لو لاقيت ليها علاقه بموضوع الأضراب شيلها ملهاش أرميها فى وشه علشان بكره هتلاقى الأعلانات شغاله هتلاقى عبارات دينيه و هتلاقى ناس ماسكين صور أشخاص بيعملو ليهم دعايا و هتلاقى شعارات تهدف فئه معينه من مدعين الليبراليه و إخوان و غيره يعنى متبقاش عبيط و أوعى تخلى حد يستغلك و أنت نازل بكره علشان مشكلتك أنت ألى هى مستوى المعيشه مش مشاكل غيرك .
أنا خوفى من رجل الشارع العادى ألى لا يعرف يهتف و لا يمسك لافته زى بواب العماره عندى ألى مصمم أنه ينزل التحرير أخشى من أن الحشود تخدعه ومثلا يحصل مشاده بين ظابط أو عسكرى و بين واحد من المتظاهرين فتغضب الحشود و تتحول من وقفه سلميه إلى معركه شرسه بين المواطنين و الأمن ألى مش بيتفاهم .
برجاء عدم مقامه أى عنف علشان كده كده الأمن بيبقى أكتر من المتظاهرين ب 10 أضعاف يعنى محدش يدفعك كده بأهانه تقوم أنت رايح ضاربه عدى و أرجع لمكان المظاهره .
الناس ألى هايقفو مع الأخوان عند نقابه المحامين و الصحفيين يعملو حسابهم أن ألى بيدخل الكوردون مش بيطلع غير لما الأمن يقرر يعنى الى يروح يعمل حسابه أنه هايقعد اليوم كله و التحرير أتوقع برده أنه محدش هايطلع بره الكوردون غير لما الأمن برده يقرر .
وربنا يستر و ميحصلش عنف و أصابات زى ما أنا مش ضامن الأمن الأمركزى برده مش ضامن غضب الحشود .
واحد وقع من هرس المتظاهرين
أوعى تنضم لتجمع عدده أقل من 20 متظاهر كل ما تنضم لتجمع كبير هاتقل فرصه أنك تتشد . فى حاله لا قدر الله مسكك العيال بتوع الكارتيه - البلطجيه متقومش و حط أيدك الأتنين على دماغك علشان ضرب القفا - النصيحه ديه عن تجربه .
يجب الأخذ فى الأعتبار أن عساكر الأمن المركزى لا يعون أى شىء فلا تحاول أن تقاوم الكوردون ضيقوه أرجع متقاومش علشان ميحصلش تضيق عنيف و تهرس ألى وراك .
تعايشوا وتعايشنّ والحق اطلع انا بقا
m00n light المراقب العام
عدد الرسائل : 474 العمر : 38 العمل/الترفيه : اكبر محامى فى مصر المزاج : زى الفل مود العضو : تاريخ التسجيل : 16/03/2008
الأحد أبريل 06, 2008 1:24 pm
