يا جماعه انا بقالى هنا معاكم ع القهوة حوالى اسبوعين وده اول موضوع ليا انا حبيت ف الاول انى اعرفكم من خلال قراءه المواضيع بتاعتكم وطبعا عرفت ناس كتير
وبصراحه من فتره كبيره وانا عايشه ف مشكله مش عارفه احلها ازاى واكيد ان المشكله دى اتعرض لها ناس كتير بس للاسف دى اول مره بتعرضلها ولانها تخص اقرب الناس ليا فمش عارفه افكر اعمل ايه
من حوالى 3 سنين اتعرفت ع بنت زميلتى ف المعهد هى كانت بنت محوله من معهد تانى هى اصلا من اسوان وخرجت من بيت اهلها لسوهاج تدرس هناك وبعد كده حولت ع القاهره تدرس هنا وكانت طبعا ف غايه من الطيبه والسذاجه والاداب بنت لسه جايه من الصعيد بالسلوفانه وكانت طبعا معاها كل افكارها المحترمه واللى للاسف يمكن نكون افتقدنها هنا ف اهل البندر لدرجه انها كانت تعتبر نكته المعهد كله ويمكن ده اللى قربنى منها انى حسيت ان جوها حاجات انا عارفها بس مش فاكرها هى كانت بتفكرنى بمعظمها المهم قربنا من بعض جدا وبقيت هى صديقتى الوحيده او الاقرب وطبعا كان جوها الانبهار بالحياه الجديده اللى بتشوفها هنا كنت ديما بحاول اشيل انبهارها ده وطبعا سريعا ما اتغير فيها حاجات كتير زى اللبس والميكاب والعدسات اللاصقه والبرفيم وكل ده وبقيت كانها من بنات البندر بالظبط المشكله بقا ان ف شاب اتقرب منها هو اصلا من بلدها بس هو ظابط حربيه يعنى معظم شغله هنا ف القاهره وللاسف ان الشاب ده بحس ان اخلاقه مش كويسه يعنى بيطلب حاجات مش من حقه اطلاقا بس المصيبه الكبيره انه بيقنعها او بيحاول يقنعها انها من حقه زى انه يخرج معاها ف اى وقت وانا يمتلكها ويكون هو رقم واحد ف حياتها حتى قبل اهلها لدرجه انه طلب منها انه يطلع البيت عندها ومفيش حد يكون موجوده وحاجات كتير زى كده المشكله انها اتعلقت بيه جدا وانا مش عارفه اعمل ايه اتكلمت معاها كتير ف الموضوع ده وانه كداب بس طبعا هى مقتنعه بيه وع اساس انه هيروح يتقدملها لما والده يتم سنه ع وفاته بس انا حساه كداب وخداع ومش عارفه اعمل ايه ياريت مكنش طولت عليكم وياريت حد يحاول يساعدنى برده عليا انا بجد خايفه عليها جدا
الأربعاء أبريل 16, 2008 10:49 pm
